Ginbuyagyag sang government contractor nga si Pacifico “Curlee” Discaya II nga nakadepende sa nagapungko nga presidente ang ginapangyo nga porsyento sa mga proyekto sang mga kongresista pinaagi sa ila nga “bag man” halin sa mga kontraktor.
Ginhimo ni Discaya ang rebelasyon sa nagapadayon nga imbestigasyon sang Senate Blue Ribbon Committee hearing may kaangtanan sa maanomaliya nga flood control projects subong nga Martes, Setyembre 23.
Ini nga rebelasyon, gin-base ni Curlee Discaya sa iya nga obserbasyon, sang termino sag nagtaliwan anay Presidente Benigno “PNoy” Aquino III, sa diin yara 10% ang kickback nga suno sa iya ginatawag nila nga “padulas” ukon ang pondo nga ginkuha sang bag man halin sa kontraktor.Nagsaka naman ini sa 12% tubtob 15% sa idalom sang termino ni anay Presidente Rodrigo Duterte.
Apang nag-doble pa ini 25% tubtob 35% sa idalom sa subong nga administrasyon ni Presidente Ferdinand Marcos Jr.Dugang pa ni Discaya nga kun indi sila magsugot sa nasambit nga sistema, ginahimuan suno pa sa iya sang problema ang ila mga proyekto paryas sang mutual termination ukon isyu sa right of way.
Ginagamit man ini sang mga opisyales agod sila malakip sa pag blacklist sa ila sa sulod sang isa ka tuig agod indi sila makalakip sa mga bidding, apang mapilitan na lang sila sa mga gusto sang opisyales batok sa porsyento sa mga maanomalya nga flood control projects.
