Nagpanawagan si Pope Leo XIV nga untatan ang nagalala nga “spiral of violence” sa Middle East, kasunod sang pag-atake sang United States kag Israel sa Iran nga ginsundan sang mga pagbalos nga airstrike.
Sa iya mensahe sa mga tumuluo sa St. Peter’s Square, nagpaandam ang Santo Papa sang posibilidad sang daki nga trahedya kun indi gilayon mapunggan ang paglala sang kinagamo.
Suno sa Santo Papa, sa atubangan sang amo nga pamahog, ginapanawagan niya ang tagsa ka nasakupan nga pungsod nga magpakita sang moral nga responsibilidad agud untatan ang nagakatabo nga karahasan antes pa ini magdala sang mas mabug-at nga halit.
Ang iya pahayag nagasunod sa padayon nga baylohanay sang pag-atake sa tunga sang Iran kag sang United States kag Israel, nga nagahatag sang dako nga kabalaka sa posible nga mas lawig nga destabilisasyon sa Middle East kag sa bug-os nga pagkalibutanon nga komunidad.
