Nagtaliwan na ang palangga nga lider sang Simbahang Katolika, si Pope Francis, subong nga adlaw, Abril 21, sa edad nga 88—isa ka adlaw matapos ang iya katapusan nga pampubliko nga pagpakita sa Easter Urbi et Orbi nga bendisyon sa Vaticano. Nagsirbi siya bilang Santo Papa sulod sang 12 ka tuig.
Natawo siya nga si Jorge Mario Bergoglio sang Disyembre 17, 1936, sa Argentina. Naghimo siya sang kasaysayan sang Marso 13, 2013, sang ini ang napili bilang ika-266 nga papa—ang una halin sa Latin America kag una nga nagpili sang ngalan nga Francis.
Nakilala siya nga isa ka papa nga may balatyagon sang reporma kag mapainubuson, kag ginahulagway nga isa ka “maverick” ukon masunuron sang iya kaugalingon nga prinsipyo sulod sa simbahan.
Siya man ang una nga non-European nga papa sa sulod sang kapin 1,200 ka tuig, sunod kay Gregory III, isa ka Syrian-born nga papa nga nagsirbi sang ika-8 nga siglo.
Sang nagligad nga bulan, ginpasulod siya sa Gemelli Hospital sa Roma bangod sang double pneumonia. Ginsiling sang mga doktor nga seryoso ang iya kondisyon, ilabi na nga may ginadala na siya nga problema sa pagginhawa halin pa sang kabataan, kun sa diin ginkuha ang bahin sang iya baga.
Pagkatapos sang lima ka semana sa ospital, ginpapauli siya apang nagpabilin nga maluya ang iya kahimtang.
Sa iya katapusan nga pagpakita sa publiko, nagtambong siya sa St. Peter’s Square sa Easter Sunday, Abril 20.
Maluya ang iya tingog, apang mabaskog ang iya mensahe kun sa diin ginpangamuyuan niya ang kalibutan nga may malipayon nga Paskwa kag nagpanawagan sang pagtakop sang tanan nga mga away kag giyera.
Ginbilin ni Pope Francis ang isa ka daku nga pamana sang pagpalangga, kapisanan, kapainubuson, kag mabaskog nga liderato sa tunga sang mga madalom nga hagit sa simbahan kag sa kalibutan.
Suno sa Universi Dominici Gregis nga konstitusyon nga naga-giyá sa pag-ilis sang Santo Papa, kinahanglan nga ilubong ini sa tunga sang ika-4 tubtob ika-6 ka adlaw matapos ang iya kamatayon.
Ang simbahan magahiwat man sang siyam ka adlaw sang kasubo samtang nagahulat sang masunod nga papa.
