Nakahimlay na sa iya ulihi nga pakadtuan ang lider sang Simbahang Katolika nga si Santo Papa Francisco sang Sabado, Abril 26.
Pribado kag simple ang ginpatigayon nga seremonya sa paglubong sa Santo Papa sa Saint Mary Major Basilica, suno sa iya mismo nga kahingyo.
Ang isa ka grupo sang mga marginalized nga tawo gin-imbitar man nga maglinya sa mga tikang sang iya ulihi nga pakadtuan sa Basilica di Santa Maria Maggiore, sa katapusan sang funeral procession.
Sa iya final nga testamento, ginhingyo ni Pope Francis nga ilubong siya sa tunga sang Chapel of the Salus Populi Romani kag Sforza Chapel, nga ara sa sulod sang Basilica of Saint Mary Major sa Roma, imbes nga sa Grotto sang St. Peter’s Basilica.
Si Pope Francis ang una nga Santo Papa nga ginlubong sa guwa sang Vatican sulod sang kapin isa ka siglo.
Ginhingyo man sang Santo Papa nga simple lang ang iya lubunganan, nga wala sang bisan ano nga dekorasyon kag may inscription lang nga “Franciscus”.
Ang St. Mary Major espesyal kay Pope Francis bangud sang iya debosyon kay Maria nga iloy sang Diyos.
Diri siya pirmi nagaampo antes kag pagkatapos sang iya mga biyahe sa iban nga pungsod.
Samtang, una na gin-anunsyo sang Vatican nga pwede na mabisita sang publiko ang puntod ni Pope Francis umpisa subong nga Domingo sang aga, Abril 27.
