Ginpahayag sang Vatican nga ang Santo Papa Francisco nagapakita sang “maayo nga reaksyon” sa iya double pneumonia kag nagabaskog ang iya kondisyon.
Ang 88-anyos nga Santo Papa subong naga-ospital sa Gemelli Hospital sa Roma sa sulod sang tatlo ka semana matapos ma-diagnose sang seryoso nga impeksyon sa baga.
Suno sa Vatican, ang iya kahimtangan stable kag nagapakita sang positibo nga reaksyon sa mga bulong.
Wala siya sang hilanat kag maayo ang iya blood tests. Padayon gihapon ang paghatag sang supplemental oxygen sa Santo Papa para sa iya pagginhawa.
Ang double pneumonia isa ka seryoso nga kondisyon nga nagapektar sa duha ka baga.
Tubtob subong, wala pa siya nagapakita sa publiko. Wala ginmention kun ano kadugay siya magapabilin sa ospital, pero suno sa eksperto, posible nga magpabilin siya didto para sa padayon nga pagbulong.
Sa guwa sang ospital, ang mga deboto nagtipon agud mag-pangamuyo para sa iya nga pag-ayo.
