KORONADAL CITY – GinAistoryahan subong sa siyudad sang Koronadal ang isa ka high-ranking police official nga ginaaligar nga naulamid sa pagpangbabaye sa isa ka apartelle sa Brgy. Morales.
Suno kay alyas ‘Kate’, asawa sang police major nga si alyas ‘Elias’ kag isa ka non-uniformed personnel sang PNP, ginkadtoan sini ang nasambit nga apartelle kun sa diin naabtan sini ang salakyan sang 37 anyos nga bana sini nga nakaparada sa sulod apang naabtan lamang ang babaye sa sulod sang kwarto kag wala didto ang iya bana.
Nangakig man suno pa ang nasambit nga babaye nga isa man ka pulis bangud iskandalosa suno pa ini kag nagdala pa sang media kag mga pulis sa iya kwarto.
Ginpanginwala naman ni alyas Elias ang nasambit nga akusasyon kag nagpaathag sa iya asawa apang nagpanindugan si Kate nga indi na niya ini mapasaylo kag pursigido nga pasakaan sang kaso sa idalom sang RA 9262 ukon VAWC.
Makatatlo ka beses na suno pa nga ginhimo sang nasambit nga police official ang pagpangluib sini sa iya.
Nahibaloan nga may duha ka bata ang magtiayon kun sa diin determinado ini nga isahanon nga pagabuhion ang mga ini kasunod sang natabo.
