COTABATO CITY – Patay ang isa ka kilala nga police intelligence agent sang ginluthang-patay sang mga suspek sa atubangan mismo sang iya nga pamilya sa parking area sang isa ka shopping mall sa Cotabato City, gab-i sang Dominggo, December 1, 2024.
Base sa inisyal nga report sang mga otoridad sang Cotabato Police Office kag ni Brig. Gen. Romeo Juan Macapaz, director sang police Regional Office Bangsamoro Autonomous Region, palakat palang si Master Sgt. Manuel Bongcawil kag iya pamilya sa undergound parking sang isa ka Mall sa Rosary Heights 7, Cotabato City sang magasakay na kuntani sa ila nga kotse ginpalapitan ini sang lalaki nga nakafacemask kag ginpalukpan ini gamit ang isa ka .45 caliber pistol.
Gilayon nga ginbawi-an sang kabuhi si Bongcawil sa atubangan mismo sang iya nga partner kag mga bata.
Madasig man nga nakapalagyo ang suspek gamit ang isa ka getaway vehicle.
Nagapati man ang pamilya sini kag mga imbestigador sang Cotabato City police force nga posible nga may kaangtanan ini sa trabaho ang brutal nga pagpatay sa iya.
Sa karon padayon man ang imbestigasyon sang kapulisan angot sa pangluthang-patay.
