Ginatun-an na sa subong sang Pamunuan sang Barangay Saravia, Koronadal City ang pag-relocate sang 12 ka mga panimalay sa bahin sang Sitio Cabuling, Brgy. Saravia, Koronadal City bangud ginakabig nga high Risk ang mga ini sa pagkatiphag sang lupa ukon landslide.
Ini ang nangin pahayag ni Kagawad Gregorio Presga sa interview sang Bombo Radyo Koronadal.
Suno kay Presga, ginatun-an sang ila nga pamunuan ang pagbalhin sang balay sang pipila ka mga residente sa kahangawa nga mangin peligroso ang mga ini sa tion nga mag-ulan bangud sa landsilde.
Ini ang desisyon sang barangay makaligad nga may napagkit nga Pocket Landslide ang natabo nga insidente sa bahin sang Sitio Cabuling, Brgy. Saravia, Koronadal City sa diin isa ka balay ang naapektuhan sang pagdaus-dus lang lupa masuwerte nalang nga wala natam-an kag natabunan sang lupa ang bug-os nga balay sang isa sa mga pamilya sa nasambit nga lugar.
Madasig naman nga nagresponde ang mga katapo sang Koronadal City Disaster Risk Reduction and Management Office (CDRRMO) kag mga rescuers sa lugar kag wala sang napilasan ukon napatay sa pocket landslide.
Padayon naman nga naga monitor ang Barangay Saravia sa tanan nga nabukid nga bahin sang ila nga lugar agud nga mahatagan sang paalinton ang mga residente sa ila nga barangay.
