Nagpatunga na ang kapulisan, kasuldaduhan kag Government of the Philippines-Coordinating Committee on the Cessation of Hostilities (GPH-CCCH) sa away nga nagapatunga sa tatlo ka base command sang Moro Islamic Liberation Front (MILF) sa Pagalungan, Maguindanao del Sur.
Ini ang nangin pahayag ni LtCol Roden Orbon- spokesperson sang 6ID PA kag Joint Task Force Central sa interview sang Bombo Radyo Koronadal.
Suno sa opisyal, naglab-ot na sa katorse (14) ang ginbawian sang kabuhi samtang 5 ang napilasan sa natabo nga engkwentro sa tunga sang mga miyembro sang Moro Islamic Liberation Front (MILF).
Dugang pa sang opisyal, ang nasambit nga engkwentro ang gina-involbaran sang grupo sang 105th MILF Base Command nga ginapangunahan ni Engr. Alonto Sultan batok sa 128th kag129th MILF Base Command nga ginapamunuan ni Ikot Akmad.
Sa inisyal nga imbestigasyon, gindul-ong sang militar si Sultan sa duta nga gin-angkon sang iban bangud ginapatihan nga ginpanubli niya ini sa iya mga “ninuno” apang makaligad nga nakapalayo ang militar ginpalukpan na ini kag nagluntad ang engkwentro.
Naguwa naman sa imbestigasyon sang militar nga madugay na nga ginaagawan sang tatlo ka clan ang halos 280 ektarya sang duta nga amo naman ang gin-ugatan sang tension sa tunga sang mga base Commands.
Bangud sa engkwenrto yara sa halos 300 ka mga indibidwal ang nagbalakwit bangud sa kinagamo sang duha ka mga grupo.
Suno naman sa Police Regional Office Bangsamoro Autonomous Region (PROBAR), nakuha na sang mga himata ang bangkay sang mga napatay samtang ang mga pilason ang padayon nga ginabulong sa hospital.
Wala naman sang sibilyan nga naulamid sa kinagamo kag nabalik na sa normal ang sitwasyon sa lugar suno sa kapulisan.
Sa karon magapatigayon sang imbestigasyon ang PROBAR kaupod ang Philippine Army kag MILF Coordinating Committee on the Cessation of Hostilities (CCCH) agud matumod ang gintunaan sang nagluntad nga kinagamo.
Wala pa sang opisyal nga pahayag sa karun si MILF Peace Implementing Panel chair Mohagher Iqbal angut sa insidente.
