Ginatun-an sang Philippine National Police (PNP), sa pagpanguna sang National Capital Region Police Office (NCRPO), ang posibilidad nga magpasang-at sang kaso batok sa pila ka miyembro sang Kilusang Mayo Uno nga nagprotesta sa atubangan sang US Embassy.
Suno kay PNP Spokesperson PBGen. Randulf Tuaño, bisan nagka-komosyon sa protesta, dali ini nakay-o kag nagkaistoryahanay ang mga rallyista kag pulis.
Iya ginpahayag nga nakita ang hugot nga maximum tolerance nga ginasunod sang pulis sa sitwasyon.
Apang padayon nga ginatun-an ang mga posible nga kaso batok sa mga rallyista, labi na nga wala man sila sang permit nga magpatigayon sang hublag-protesta sa lugar.
Posible man nga magaatubang sang kaso ang mga naulamid sa reklamo nga nagalapas sa Batas Pambansa Blg. 880.
Ginpahinumduman sang pulisya ang tanan nga militante nga grupo nga ang US Embassy indi isa ka freedom park kag indi sakop sang mga lugar nga mahimo pagpatigayonan sang mga programa ukon hublag-protesta.
