Ginalantaw na sang Philippine National Police (PNP) nga isa sa mga posible nga motibo sa pagdukot kag pagpatay sa Filipino-Chinese nga negosyante nga si Anson Que kag sa iya drayber nga si Armanie Pabillo amo ang posible nga pagkasangkot sang mga ini sa mga aktibidad sang Philippine Offshore Gaming Operators (POGO).
Suno kay PRO III Director kag PNP Spokesperson PBGen. Jean Fajardo, posible nga may kahilabtanan si David Tan Liao kag pila pa ka mga indibidwal sa mga aktibidad nga ini kag ginatan-aw nga posible man nga sila ang may kalabutan sa amo nga krimen.
Ini ang pila lang sa mga indikasyon nga ginapamatud-an sang PNP nga ang insidente, lakip na ang mga tawo nga nagkuha kag nagpatay kay Que, may posibilidad nga may koneksyon sa POGO.
Sa ginpatuman nga search warrant sa puluy-an nga ginaestaran ni Liao, nasamsam sang mga otoridad ang pila ka computers kag gadgets nga posible ginamit sa pag-operate sang scam hubs kag iban pa nga POGO-related nga aktibidad.
Daku man ang posibilidad nga ang amo nga balay indi lang lugar sang krimen kundi ginaduda nga isa man ka mini POGO hub.
Samtang, naka-schedule nga isailalom sa forensic examination ang mga nakuha nga gadgets para sa data analysis agud mahibaluan kon ginamit ini sa scam ukon sa bisan ano nga POGO-related nga operasyon.
May pila man ka ebidensya nga yara na sa kustodiya sang PNP nga mas makapalig-on sa kaso batok kay Liao bilang isa ka operator sang kidnap-for-hire syndicate nga nagabaton sang mga sugo halin sa mga financiers para patyon ang mga biktima.
Sa karon, yara na sa proseso sang dokumentasyon sang mga ebidensya ang PNP kag Anti-Kidnapping Group Unit agud madakpan na ang mga indibidwal nga may kalabutan sa amo nga insidente.
