KORONADAL CITY– Nagpagwa na sang statement Philippine National Office 12 angot sa nagalapta sa internet nga cartographic sketch suno pa sang Isulan bombing suspect.
Sa ekslusibo nga interbyu sang Bombo Radyo Koronadal kay PSupt. Aldrin Gonzales ang tagpamaba sang PNP regional office 12, wala suno pa sa ila naghalin ang nasambit nga cartographic sketch kun sa diin indi sini makumpirma kun lehitimo bala ang sketch nga naga circulate sa social media apang sa pihak nga bahin, wala man ginpahayag sang opisyal kun peke ini.
Samtang gin-insister man sini nga ang gindihon lang nga Special Investigation Task Group (SITG) Hamungaya ang makakumpirmar kun ang nagalapta nga itsura sang suno pa Isulan bombing suspect ang opisyal nga cartographic sketch nga igapalapta sa publiko.
Kaangot sini, nagpanawagan naman ini pinaagi sa Bombo Radyo nga makigbuligay ang pila sa mga nakasaksi sa panghitabo agud mapadasig ang pagdakop sa mga suspek kun sa diin ginalauman nga dako nga bulig ang P1 million reward money nga ginpagwa sang Regional Peace and Order Council 12.
Madumduman nga ang Isulan bombing sa Brgy. Kalawang 3 Isulan Sultan Kudarat nga nagluntad sang Agusto 28, 2018 ang nag-bilin sang 3 patay kag masobra 30 pilason.
