Ginkwenstyon sang mga estudyante sang Pamantasan ng Lungsod ng Maynila (PLM) ang paghatag sang university administration sang honorary Doctor of Laws degree kay President Ferdinand Marcos Jr.
Gin-uyonan ini sang PLM Supreme Student Council kag 33 ka iban pa nga local student councils kag organizations, nga nagpagwa sang joint statement batok sa resolusyon sang Board of Regents.
Ginpahayag sang mga estudyante nga wala sila ginkonsulta antes gin-aprubahan ang award kag ginpaandam nga mahimo nila ini makita bilang pag-endorso sa administrasyon ni Marcos nga nagaatubang sang nagkalain-lain nga kontrobersiya.
Gin-highlight man nila ang maragtas sang PLM bilang buluthuan nga may handum sa pagpanalipod sang katungdanan sang estudyante kag media, lakip ang legasiya ni Liliosa Hilao, ang PLM student journalist nga napatay samtang gin-detain sa panahon sang Martial Law sa idalom sang administrasyon ni Marcos Sr.
Ginbaton ni Marcos ang honorary Doctor of Laws degree sang Agosto 27 bilang kabahin sang graduation rites sang unibersidad.
Suno sa PLM, ginhatagan nila sang pagkilala ang suporta ni Marcos sa unibersidad, lakip ang proyekto para sa PLM Allied Health Sciences Building nga pagabag-uhon halin sa daan nga Ospital ng Maynila facility.
Apang para sa mga estudyante, mas labaw sa award mismo ang ila ginakwestiyon: ang proseso, konsultasyon, kag prinsipyo nga dapat konsiderahon antes maghatag sang pinasahi nga pagkilala sa isa ka nagapungko nga presidente.
