Gina-istoryahan karon sa nagkalain-lain nga mga social media websites ang isa ka plastic bag nga naga-unod sang hangin, apang nabaligya sa balor nga $7,600 ukon katumbas sang P377, 000 sa online auction site nga eBay!
Suno sa eBay seller, ang hangin nga unod sang plastic bag ang gikan sa ‘listening event’ para sa studio album nga Donda sang sikat nga American rapper, singer, songwriter, kag fashion designer nga si Kanye West sa Mercedez-Benz stadium sa Atlanta, Georgia.
Ginapahayag nga limitado kag madasig nga na-sold out ang mga ticket sa listening event rason nga madamu nga fans ang wala makalantaw sang live performance, nga nagpamati na lamang sa stream sang isa ka music app nga nag-angkon sang milyon nga viewers.
Bangud diri, naisipan sang seller, nga masuwerte nga nakabakal sang ticket, nga tipunon sa isa ka resealable plastic bag ang hangin gikan sa event.
Nagsugod sa $3,330 ang pauna nga bid kag wala pa 24 oras, nagdangat na ang subasta sa kantidad nga $7,600 nga amu ang nangin winning bid.
Indi ini ang una nga beses nga ginsubasta ang hangin gikan sa konsyerto ni Kanye bangud sang 2015, may kasubong man nga ginhimu sa iya Yeezus concert nga nabaligya naman sa balor nga $65,000.
