KORONADAL CITY-Dako ang posibilidad nga matuga pa kuntani sang isa ka bombing incident ang grupo sang Alkhobar Terrorist Group sa bahin sang North Cotabato kun wala pa nadakpan ang isa sa ginakabig nga “Planner” kag Bomb Expert nga si Ali Akbar nga katapo man sang Dawlah Islamiya-Hassan Group nga naarestar sang 602nd IB, 90th IB, 72nd IB, Kidapawan City Police Station kag 1st Cotabato Provincial Mobile Force sa ginapanaguan sini sa syudad sang Kidapawan.
Ini ang gin tagaan sang ligwa ni Lt.Col John Paul Baldomar, Tigpamaba sang 6ID Phil.Army sa interview sang Bombo Radyo Koronadal. Suno sa opisyal, kun wala pa nadakpan sang mga otoridad si Akbar, posible nga nag tuga na ini sang atrosidad Mindanao bangud may 2 ka mga Improvised Explosive Device (IED) kag iban pa nga mga IED components.
Dugang pa sini, napamatud-an nga ini ang kabahin sang Alkhobar Terrorist Organization kag Daulah Islamiyah-Hassan Group bangud sa mga text messages nga na retrieve sa iya nga cellphone. Pahayag pa sang tigpamaba, makabig sa gihapon nga delikado si Akbar apesar may deperinsya na ang panan-awan sini. Madumduman nga ang isa si Akbar sa Alkhobar Terrorist Organization kag Daulah Islamiyah-Hassan Group nga responsable sa pagpanunog kag pagpangikil sa mga bus companies sa Mindanao kag responsable man sa pagpasigabong sang isa ka IED sa banwa sang Tulunan sang bulan sang Enero kag pagpanunog sa isa ka Unit sang YBL sang HUnyo 3 subong nga tuig.
Sa subong naga padayon ang pagpangita pa sa 7 ka mga kaupdanan ni Akbar sa pagtuga sang mga atrosidad.
