KORONADAL CITY – Yara sa pito ka barangay sa banwa sang Tulunan, North Cotabato ang ginakabig nga indi na luwas nga balikan sang mga residente makaligad ang serye sang linog.
Bangud sini, nagpangita na ang lokal nga gobyerno sang Tulunan sang mga lugar nga sarang balhinan sang mga apektado nga mga pumuluyo.
Sa esklusibo nga interbyu sang Bombo Radyo Koronadal kay Abraham Contayoso, Secretary ni Tulunan Mayor Reuel Limbungan, ginpahayag sini nga gilayon nga ginmandu-an ang mga Brgy Officials sang nasambit nga mga barangay nga magpangita sang luwas nga area nga sarang balhinan sang mga pumuluyo.
Makaligad sini, gilayon man nga nagpatawag ang LGU sang mga representante halin sa Phivolcs agud nga mahibaluan kun luwas ang mga ini, kag diri nakit-an nga ang mga relocation sites ang safe para sa mga residente.
Lakip sa mga ginrekomendar nga balhinan amo ang mga eskwelahan, brgy hall, health center kag day center.
Sa subong, padayon ang pagpangita sang pondo bangud may lugar nga kinahanglan baklon para sa mga pumuluyo.
