Nagtipon ang grupo sang mga kababaihan sa St. Peter’s Basilica kag nagpagwa sang pink nga aso bilang simbolo sang ila pagkadismaya sa padayon nga pagdumili sa ila katungdanan nga mangin kabahin sang Simbahan.
Suno kay Miriam Duignan sang Wijngaards Institute, tigpamaba sang protesta, ginpahayag niya sa mga kardinal nga indi nila dapat isikway ang tunga sang populasyon sang mga tumuluo sa pagdesisyon para sa palaabuton sang Simbahang Katolika.
Nanawagan man sila sang pagbag-o bisan pa nga may posibilidad nga madakpan si Duignan, pareho sang natabo sang 2011 sang ginpaninguhaan niya nga magsulod sa Vatican agud personal nga ihatag ang ila petisyon.
Suno pa sa ila, ang mga kababaihan may importante nga papel sa Simbahan sang una pa antes mareporma ang medieval nga sistema nga naghatag sang labaw nga gahum sa mga lalaki sa pagdumala sang Simbahan. Apang tubtob subong, indi gihapon ginatugotan nga maordinahan ang mga kababaihan, bisan pa nga madamo sa ila may mataas nga edukasyon sa pastoral kag teolohiya.
Bisan pa nga may pila ka tikang si Pope Francis sang una sa paghatag sang mas mataas nga papel sa mga kababaihan sa sulod sang Simbahan pareho sang pag-imbitar sa ila sa Synod kag pag-usisa sa posibilidad nga mangin diakonesa sarado gihapon ang porta para sa ila ordinasyon bilang pari.
Para sa mga aktibista, ini indi lang isyu sang representasyon kundi isa ka isyu sang hustisya kag moralidad.
