KORONADAL CITY – Emosyunal nga nagpadulong sa waragwagan sang Bombo Radyo Koronadal ang amay sang isa ka Pinay Domestic helper nga suno pa naglumpat sa 5 ka palapag nga edifisyo sa Riyadh, Saudi Arabia kag yara sa kritikal nga sitwasyon sa subong.
Ginkilala ang Pinay DH nga si Gina Uday Monpon, 28 anyos, gikan sa Brgy. Kematu, Tboli, South Cotabato, may bana kag 3 ka bata.
Sa panaysay0on sang iya amo nga si Federico Monpon, kahapon lamang nila nahibaluan ang natabo kay Gina matapos nga ginpahibalo sang abyan sini.
Suno kay Federico,lima ka bulan pa lamang nga nagatrabaho sa nasambit nga pungsod si Gina kun diin wala naman suno pa ini sang nangin problema sa iya employer.
sang nagligad nga semana sang nahospital ang isa sa iya 3 ka bata kag didto na ini nagsugod sa pagproblema kag ginpahayag sa amay nga mapauli na lamang ini bangud naluoy siya sa iya mga bata.
Sandig sa impormasyon nga ila nga nabaton nakita na lamang si Gina nga nagalakat sa 5th floor sang edifisyo nga ginatrabahuan sini tubtob nga naglumpat ini.
Apang sa panaysayon ni Gina, wala suno pa siya sa iya kaugalingon bangud nagakatulog siya kag wala makahibalo sa iya ginahimo.
Ginhana pa kuntani siya nga luwason sang mga pinoy nga nakakita sa iya.
Nag-angkon sang bali sa tiil kag spinal cord si Gina nga gilayon gindala sa isa ka hospital sa nasambit nga pungsod.
Sa subong wala pa mapaidalom sa operasyon si Gina bangud indi luyag sang employer sini nga akuon ang gastos.
Rason nga nagahilibion nga nagpanawagan sa Bombo Radyo ang iya amat agud mabuligan ini.
