KORONADAL CITY – Personal nga nagpadulong sa waragwagan sang Bombo Radyo Koronadal ang isa ka bata sang OFW nga biktima sang pagmaltrato sa iya nga employer sa Saudi Arabia agud mangayo sang bulig.
Nahibaluan nga naglab-ot na sa 4 katuig ang iya nga iloy sa abroad kag wala pa ini makapauli.
Ginkilala ang OFW nga si Ruth Tabunyag, 48-anyos, kag residente sang Palimbang, Sultan Kudarat.
Ginpahayag ni Jimboy Tabunyag ang bata sang OFW nga masobra na sa 4 ka bulan nga wala nakabaton sang sweldo ang iya iloy kag ginasakit pa ini sang iya bag-o nga amu nga mal-am.
Nahibaloan man nga natapos na ang kontrata ni Tabunyag sa Saudi kag indi ini papulion sang iya anay amu nga si Ibrahim Mohammed Solaiman kun sa diin ginpasa ang pinay DH sa balay sa iloy sini.
Gindugang pa ni Jimboy nga gintawagan na sini ang recruiter sang iya iloy nga si Fatima Acmad angut sa natabo agud nga mabuligan ang mga ini.
Nagpromisa naman si Acmad nga tawagan ang iya sini iloy sa abroad apang wala ini natuman kag lima na ka bes nga nagpadulong ini sa puluy-an sang recruiter apang masambi nga indi niya ini maabtan rason nga nagdesisyon na lamang ini nga magapadulong sa waragwagan sang Bombo Radyo Koronadal.
Handum naman sang bata nga makapuli na ang iya iloy agud nga matapos na ang pagpangabudlay sini sa kamot sang iya bag-o nga amo kag kasubong nga nagapamilin-bilin na ini sa iya kabataan sa kawad-an sang paglaum nga makapauli ini sang buhi sa Pilipinas.
