KORONADAL CITY – Nagbakwit ang mga residente sa banwa sang Bagumbayan, Sultan Kudarat makaligad ginbaha ang mga kabalayan kag mga pananom.
Sa interbyu sang Bombo Radyo Koronadal kay correspondent Boyet Forro, nag-umpisa suno pa ang pagbaha takna alas 6 kagab-i sa bahin sang Prk. Bagong Silang sa Brgy. Poblacion makaligad nga nagsaka ang lebel sang tubig sa Molo River bangud sa mabaskog nga pagbubo sang ulan kag hangin.
Pila ka mga pananom man ang gindalasa sang nasambit nga pagbaha.
Suno sa pila ka mga residente, tubtob sa tuhod ang kadalumon sang tubig-baha kun sa diin halos isa ka purok suno pa ang apektado.
Sa subong padayon ang damage assessment sang Municipal Disaster Risk Reduction and Management Council sa mga apektado nga mga residente kag ginhatagan na sang relief packs ang mga ini samtang ginpasiguro naman sa mga mangunguma ang nagakaigo nga ayuda sa mga pananom nila nga ginguba sang nasambit nga kalamidad.
