Dismayado ang pila sa mga Pinoy sa bahin sang US sa resulta sang trade agreement sa tunga nanday US President Donald Trump kag Pangulong Ferdinand Marcos Jr.
Sa interview sang Bombo Radyo Koronadal kay Mr. Peter Jabido-=, Bombo Correspondent to US, ginpahayag sini nga nadismaya ini sa resulta sang istoryahanay nanday Pangulong Marcos kag President Trump bangud 1% lamang suno halin sa 20% nga taripa ang ginkakas sang Amerika sa produkto sang Pilipinas nga nakita sini nga isa ka butang nga ang US lamang ang makapulos samtang zero naman ang taripa sang Pilipinas sa mga produkto nga halin sa US nga dako nga butang ang epekto sa ekonomiya sang Pilipinas.
Madumduman nga ginpakamalaot ni US President Donald Trump ang anay administrasyon sang pungsod Pilipinas samtang gindayaw naman sini ang administrasyon sa pagpamuno ni President Ferdinand Marcos Jr.
Ini ang kasunod sang ginpatigayon nga pagsinapol sang duha ka mga lider sa White House sang nagbisita si Marcos sa Washington DC.
Suno kay Trump wala nakahibalo ang anay administrasyon sang ila nga ginahimo apang wala man ini naghambal kung ano kag sin-o ang iya ginatumod.
Dugang pa diri ang pagkumparar sini sa anay administrasyon sa mga lider sa Southeast Asian countries nga makabig ikatatlo sa may pinakadalagko nga ekonimiya.
Angot diri gintawag man sini nga isa ka respetado nga sahi sang lider si Marcos kag ginapanan-aw sini ang mas madalum pa nga kolaborasyon sang US kag Pilipinas.
