KORONADAL CITY- Nagapadayon ang panawagan sang bulig para sa mga survivors sang magnitude 7.5 nga linog nga nag-igo sa Palu, Sulawesi, Indonesia makaligad nga magsaka na sa masobra 1,300 ka death toll ang ginbilin sang kalamidad kag madamo sa gihapon ang missing.
Sa ekslusibo nga interbyu sang Bombo Radyo Koronadal kay Bombo International Correspondent Doula Rustianto, nga amuh ang nagapamuno sa mga social workers sang Semarang Cross Religions Community o SEMALiga sa Palu, Indonesia, ginakahadlukan nga madugangan pa ang numero sang mga patay bangud madamo sang mga surudlon nga mga lugar ang wala sa gihapon malab-ot sang mga rescuers bangud sa mga guba nga dalan kag indi functional nga communication lines.
Nahibaluan nga kalakip sa mga lugar nga mabudlay nga masulod sang mga rescuers amuh ang Sigi kag Parigi Moutong Regencies.
Samtang sa pihak nga bahin. ginpahayag ni Rustianto nga ginatatap sang ila simbahan ang pila ka mga survivors kun sa diin nagapanguna nila nga problema sa karun amuh ang malimpyo nga tubig nga ila mainom.
