KORONADAL CITY – Balik na sa klase ang pila ka pampubliko nga mga buluthoan sa Kidapawan City subong nga adlaw, Nobyembre 11.
Nahibaluan nga ginrekomendar ni Schools Division Superintendent Romelito Flores sa alkalde sang syudad ang pagpili sang mga buluthuan nga liwat nga maka-angkon sang klase bangud padayon pa ang ginahimo nga inspeksyon sang mga otoridad sa pila ka buluthuan nga naguba bangud sa asod-asod nga linog.
Ang mga buluthuan naman nga indi pa makabalik ang klase, magapatukod na lang sang temporary learning shelters.
Samtang, sa North Cotabato naman, ginpahayag ni Schools Division Superintendent Omar Obas may klase na ang mga buluthuan sa ila nga probinsya magluwas na lamang sa Brgy Daig, Magbok kag Paraiso sa banwa sang Tulunan nga tuman nga naapektuhan.
Madumduman nga una na nga ginpahayag sa Bombo Radyo Koronadal ni DEPED 12 Regional Director Dr Allan Farnazo nga nagpatukod na ang ahensya sang Temporary Learning Shelter sa mga buluthuan nga naka-angkon sang kabug-anan bangud sa mabaskog nga pagtay-og.
