KORONADAL CITY – May kabalaka sa gihapon ang pila ka mga Filipino sa Estados Unidos kaangot sa pagpanagtag sang covid-19 vaccine sa mga estado.
Ini apesar gin-umpisahan na sang pharmaceutical company nga Pfizer ang pagpanagtag sang nasambit nga bakuna para sa mga Amerikano.
Sa interbyu sang Bombo Radyo Koronadal kay Jelin Dohina Asamoah sang New York kag tumandok sang Tampakan, South Cotabato, ginpahayag sini nga indi siya magpabakuna labi na nga wala pa siya nakahibalo kun ano ang mangin long-term effect sini sa isa ka indibidwal.
Kinahanglan man suno pa sini sang mas maid-id pa nga pagtuon kaangot sa nasambit nga bulong batok sa virus.
Apang ginpaathag sini nga indi naman pwersahan ang pagpabakuna kun sa diin may mga waiver nga mahimo pirmahan ang isa ka tawo kun sa diin indi niya basulon ang kumbyohan kun may matabo sa mga ini bangud wala nagpabakuna.
