KORONADAL CITY – Nagahulat pa ang National Food Authority (NFA) South Cotabato sang implementing guidelines para sa pagpatuman sang Bigas 29 o Kadiwa 29 program kun diin magabaligya ang mga ini sang Php29 pesos nga kilo sang bugas.
Ini ang ginpahayag ni Jeomar Fajartin, Branch Manager NFA South Cotabato sa interview sang Bombo Radyo Koronadal.
Suno kay Fajartin, una nga nag-implementar sini ang pilot areas kasubong sang Metro Manila rason nga nagahulat pa ang NFA South Cotabato sa go signal sa pagpatuman naman sini diri sa probinsiya.
Sa tion nga mapatuman ini ginpasiguro sang opisyal nga may ikasarang ang ila talatapan kag may nagakaigo nga stocks sang bugas agud ibaligya sang barato sa mga nagakinahanglan.
Ang programa nga “Bigas 29” ang limitado lamang sa vulnerable sector kaangay sang mga benepisyaryo sang conditional cash transfer program sang gobyerno, persons with disabilities, senior citizens kag solo parents.
Magluwas sini, ginpasigurado naman sang NFA nga ang ibaligya nga daan nga bugas ang maayo ang kalidad.
