KORONADAL CITY – Ginkalipay sang militar ang pagpatigayon sang mga miyembro sang indigenous people (IPs) sang ila protesta batok sa mga rebelde nga New People’s Army (NPA).
Sa interbyu sang Bombo Radyo Koronadal kay 33rd Infantry Battalion Philippine Army commander Lt. Col. Harold Cabunoc, mismo nga sila na ang naghambal kag ginpahayag nga indi na nila pagasuportahan ang nasambit nga komunista nga grupo.
Dugang pa sang opisyal, dako nga bulig ang pagpakig-angot sang AFP kag mga LGUs sang President Quirino, Senator Ninoy Aquino kag Bagumbayan agud makatalupangod ang mga IPs nga may gobyerno nga naga-amuma sa ila.
Madumdoman nga kapin 30 miyembro sang Manobo Dulangan tribespeople ang nagpahayag sang ila hibubun-ot batok sa NPA sa atubang sang SOCCSKSARGEN regional center sa Barangay Carpenter, Koronadal City kun sa diin ginpangunahan ini nanday IP tribal leader Bai Nenita Billones kag isa ka certain “Ka Jason” nga isa ka rebel surenderee.
Magluwas sa mga IPs, nag-upod man sa ila ang pila ka miyembro sang NPA kun sa diin gintawag nila ang komunista nga grupo nga mga terorista kag manugtonto.
