Ginpaklaro sang Philippine Institute of Volcanology and Seismology (PHIVOLCS) nga fog ukon hamog, kag indi volcanic smog, ang nakita halin sa Bulkang Mayon sang Biernes, Enero 9, sa probinsya sang Albay.
Suno kay PHIVOLCS Chief sang Volcano Monitoring and Eruption Prediction Division nga si Mariton Bornas, sa interview sa Bombo Radyo, indi normal nga maeksperyensya ang volcanic smog ukon vog sa bulkan bangod ini mataas, kag ang gina-buga sini nga sulfur dioxide nagakalat ukon naga-dissipate sa upper atmosphere.
Dugang niya pa, nga indi pareho sa Bulkang Taal nga medyo mababa ang lugar kag amo na ang rason nga may volcanic smog sa palibot sini.
Suno pa sa opisyal nga kon may volcanic smog man sa Bulkang Mayon, sigurado nga malayo ini sa mga komunidad.
Suno pa kay Bornas, ang volcanic smog indi lang makita kundi mabatyagan man sang mga tawo, kag posible nga makahatag sang kasakit sa mata, ilong kag tutunlan tungod sa nalanghap nga sulfur dioxide.
Sa karon, wala pa sila sang natala nga may tawo nga nakaeksperyensya sini.
Padayon gihapon ginapahanumdom sang ahensya ang publiko nga likawan ang pagsulod sa 6 km radius Permanent Danger Zone tungod sa padayon nga lava dome eruption sa nasambit nga bulkan.
