Nagpaalala ang Philippine Exporters Confederation Inc. (Philexport) nitong Linggo na maaaring magdulot ng malawakang epekto sa global supply chain ang tumitinding tensyon sa Middle East, kasunod ng pag-atake ng Estados Unidos at Israel sa Iran at ang pagbalos ng Iran.
Ayon sa pahayag ng grupo, ang mga pag-atake at target sa mga bansa sa rehiyon na may mga base militar ng US, pati na rin ang paghigpit sa Strait of Hormuz, ay nagdulot ng pagkaantala sa airspace at logistics, at nagpalala ng volatility sa energy markets.
Binigyang-diin ng Philexport na ang mas matagal na epekto sa ekonomiya at mas mataas na gastusin ay maaaring makaapekto sa daloy ng kalakalan sa buong mundo.
Dagdag pa ng grupo, maaari rin nitong maapektuhan ang price competitiveness ng mga produktong Pilipino sa pandaigdigang merkado.
