Gin-identify sang Pentagon ang apat sa anum ka miyembro sang US service, nga napatay sa drone strike sang Iran.
Ang mga suldado, ginkilala nga sanday Capt. Cody Khork, 35; Sgt. 1st Class Noah Tietjens, 42; Sgt. 1st Class Nicole Amor, 39; kag Sgt. Declan Coady, 20.
Ang apat ka mga napatay, kabahin sang 103rd Sustainment Command, isa ka Army Reserve sustainment unit nga naka-base sa Iowa.
Ang duha pa ka suldado nga napatay sa amo man nga pag-atake, wala pa ginhingadlan sang mga otoridad.
Suno sa report, ang ginapatihan nga drone strike nag-igo sa temporaryo nga tactical operations center sa pantalan sang Shuaiba sa Kuwait sang Domingo. Sang tion sang ila kamatayon, nagaserbisyo ang mga suldado upod sa 1st Theater Sustainment Command.
Suno sa isa ka source nga may ihibalo sa insidente, wala sang sirena nga nabatian ukon paandam antes ang pag-atake, gani wala sang nagaka-igo nga tion ang mga suldado nga makapanago sa bunker.
Base naman sa pahayag sang US Central Command, may yara pa sang 18 ka mga service members ang naka-agum sang pilas, bangud sang nagapadayon nga tensyon kag inaway kontra Iran.
Samtang, ginpahayag ni Donald Trump kag Defense Secretary nga si Pete Hegseth, nga posible pa nga may madugang nga casualty bangud sa nagaluntad nga kinagamo.
