Nagapanawagan sang bulig ang Philippine Coast Guard (PCG) sa Kongreso agud mapabakod ang depensa sang Pilipinas sa West Philippine Sea.
Partikular nga hangyo sang ahensya amo ang pagdugang sang ila budget para sa Fiscal Year 2026.
Suno kay PCG Spokesperson Commodore Jay Tarriela, subong pa lang nagapakig-angot na si PCG Commandant Admiral Ronnie Gavan sa Senado kag sa Kamara.
Kinahanglan ang dugang nga mga asset, pareho sang 97-meter Multi-Role Response Vessels (MRRV) nga pareho sang BRP Teresa Magbanua (MRRV-9701), agud mas maprotektahan ang soberanya sang pungsod sa West Philippine Sea.
Ginpahayag man ni Tarriela nga tuyo sini nga masiguro ang seguridad sang mga Pilipinong mangingisda batok sa ginahimo nga pangharas sang China sa amo nga kadagatan.
Sa subong, duha lang ka dagko nga MRRV ang ara sa PCG amo ang BRP Teresa Magbanua kag BRP Melchora Aquino.
