Magapadala ang Philippine Coast Guard (PCG) sang barko agud bantayan kag siguraduhon ang kaluwasan sang ika-apat nga civilian mission sang Atin Ito Coalition sa West Philippine Sea (WPS) sa bulan sang Abril.
Ginkumpirmar ini ni PCG Spokesperson para sa West Philippine Sea, Rear Admiral Jay Tarriela, nga magapadala sila sang barko bilang escort kag masiguro ang seguridad sang mga sibilyan sa tunga sang posible nga presensya sang Chinese Coast Guard (CCG).
Ini bisan pa ang nasambit nga misyon isa ka independent nga civilian initiative.
Sunod kay Tarriela, ang Atin Ito convoy inisyatibo sang civil society kag boluntaryo, kag wala sila ginpwersa ukon ginpasugtan nga magpahamtang sang ika-apat nga civilian mission.
Ginkalipay sang PCG official ang nagadako nga partisipasyon sang publiko sa sini nga mga sibilyan nga misyon, nga nagapakita sang mataas nga kahibalo sang mga Pilipino sa pagpanalipod sang soberanya sang pungsod.
Ang tuyo sang convoy amo ang pagpanalipod sang katungdanan sang Pilipinas sa WPS kag paghatag sang suporta sa mga manugpangisda kag residente sa Pag-asa Island.
Nauna nga ginpahayag ni Atin Ito Coalition co-convenor Rafaela David nga target sang bag-o nga civilian mission ang pagtutok sa mga isyu pareho sang aktibidad sang China nga pag-eespiya sa pungsod kag epekto sang nagataas nga presyo sang gatong sa mga manugpangisda nga Pilipino.
