Ginkumpirmar sang Philippine Coast Guard (PCG) nga nagapadayon ang ila “vigilant monitoring” sa “monster ship” sang China Coast Guard (CCG) nga yara sa sulod sang exclusive economic zone (EEZ) sang Pilipinas.
Sa isa ka statement, ginsiling sang PCG nga nagapanindugan ang mga crew sang monster ship nga nagapatigayon sila sang law enforcement operation sa pagpati nga may hurisdiksyon sila sa amo nga kadagatan nga suno sa ila, ginapanag-iyahan sang People’s Republic of China.
Bilang sabat, padayon man nga ginahangkat sang Barko ng Republika ng Pilipinas (BRP) Cabra ang amo nga pagpati sang CCG kag wala ginauntat ang ila pagsunod sa monster ship agud depensahan man ang soberenya sang pungsod.
Una nga nasiplatan ang Chinese vessel nga may registration number 5901 sa 54 nautical miles halin sa Capones Island, Zambales sang Sabado, January 4.
Gin-report naman sang PCG nga nagapadulong ang natumod nga barko malapit sa Lubang Island sa Occidental Mindoro sini nga Lunes sang aga, January 6.
Suno kay National Security Council Assistant Director General Jonathan Malaya, padayon nga nagapatigayon ang pwersa sang Pilipinas sang radio challenges sa barko sang China.
Ginsiling man sang PCG nga ang presensya sang China isa ka ploy para nga pahugon ang mga mangingisda nga Pinoy sa natumod nga area.
