Ginsiguro ni President Ferdinand Marcos Jr. ang iya suporta sa National Task Force to End Local Communist Armed Conflict (NTF-ELCAC).
Suno kay National Security Council Assistant Director General Jonathan Malaya, nagpanindugan ang presidente nga indi niya pabuwagon ang task force.
Ini bisan pa sa panawagan sang Makabayang law maker nga ipa-abolish ang nasambit nga task force.
Suno kay Malaya, ginakilala mismo sang Presidente ang kadag-an sang task force sa pagpahina sang CPP-NPA-NDF.
Base sa ulat sang NTF-ELCAC, nagnubo na ang numero sang mga nabilin nga pwersa sang NPA.
Halin sang dati nga 89 ka guerilla fronts, isa na lang ang nabilin nga “weakened” nga guerilla front sa Camarines Sur, nga ginapaabot nga madismantle na man karon nga tuig.
Sa subong, yara na lang sa 1,050 ang nabilin nga armado nga kasapi sang NPA sa nagkalain-lain nga parte sang pungsod.
Lakip sa mga ginatumod nga rason sang pagkadula sang CPP-NPA amo ang pagkadula sang ila mga lider nga pareho kanday Joma Sison, Benito kag Wilma Tiamzon, kag Myrna Sularte, pati na ang ginhimo nga mas pinaligon nga operasyon sang militar kag kapulisan, ang Barangay Development Program, kag ang localized peace engagements.
Dugang pa diri, suno kay Malaya, tungod sa paghina sang pwersa sang rebeldeng grupo, indi na sila makasukot sang “revolutionary tax” kag indi na man sila makapadayon sang “permit to win” kag “permit to campaign” sa palaabuton nga eleksyon, nga dugay na nga isyu kada eleksyon.
