Ginkumpirmar ni Ferdinand Marcos Jr. ang una nga Pilipino nga napatay sa nagapadayon nga kinagmo sa Middle East.
Ginpahayag sang Presidente nga ang biktima amo si Mary Anne Velazquez Rivera, isa ka caregiver halin sa Pangasinan nga nagaubra sa Israel.
Suno sa report nga nabaton sang gobyerno sang Pilipinas nga ginabuligan ni Rivera ang iya ward ukon alaga padul-ong sa bomb shelter sang matabuan sila sang pag-atake antes makalab-ot sa luwas nga lugar.
Ginkilala ang biktima sang iya bana nga isa man ka overseas Filipino worker sa Israel.
Suno kay PBBM, padayon nga ginamonitor sang gobyerno ang kahimtangan sang mga Pilipino sa rehiyon samtang nagapadayon ang kinagamo.
Nauna na nga ginpahayag sang gobyerno nga ang mga embahada kag labor offices sa Middle East yara sa heightened alert agud masiguro ang kaluwasan sang mga overseas Filipino workers bangud sa nagalala nga tensyon.
Madumduma nga naglunsyar ang Estados Unidos kag Israel sang dako nga military operation batok sa Iran, nga suno kay Donald Trump amo ang pagpaubos sang military capability sang Tehran kag pagneutralize sang ginakabig nga nuclear threat.
Bilang sabat, nagpalupok ang Iran sang mga drone kag missile padul-ong sa Israel kag nagtarget man sang US military facilities sa Bahrain, Kuwait kag Qatar, nga nagdugang sang tensyon sa rehiyon nga ginatiniran sang milyon ka mga overseas Filipino workers.
