Nanindugan si anay Presidential Spokesperson Salvador Panelo nga magka-reconciliation lang sa tunga nila President Ferdinand Marcos Jr. kag pamilya Duterte kun mabalik sa Pilipinas si anay presidente Rodrigo Duterte.
Sa isa ka interview, napamangkot si Panelo parte sa ginpahayag ni President Marcos nga bukas siya makig-uli sa pamilya Duterte, kaupod ang handum nga malikawan ang mga ina-way kag mapalapnag ang pagkaisa para sa kauswagan sang pungsod.
Sabat ni Panelo, kinahanglan nga mabalik anay sa Pilipinas ang anay presidente, labi na kay klaro nga iligal ang ginhimo nga pag-aresto kag pagpasulod sa iya sa International Criminal Court detention facility sa Netherlands.
Pwede man, suno sa iya, magkabaton sang reconciliation kung matuod si President Marcos kag kung matugunan na niya ang madamo nga mga problema nga ginaatubang sang pungsod.
Ginpamatud-an man sang madamo nga mataas nga opisyal sang pungsod kag mga organisasyon ang ila kalipay sa ginpahayag ni President Marcos nga luyag niya makig-uli sa tanan tungod wala siya sing gusto nga away.
Lakip sa mga nagpahayag sang kalipay amo ang Catholic Bishops’ Conference of the Philippines (CBCP), mga senador, kongresista, kag iban pa.
Una man nga ginpahayag ni anay Presidential Spokesperson Harry Roque ang amo nga sentimyento.
Bisan ginbatikos lang ni Roque ang pahayag ni President Marcos, ginpahayag niya nga kung makakita ang presidente sang paagi nga mapaguwa ang si Duterte sa detention facility sang ICC, posible nga magumpisa pa ang pag-ulianay.
