KORONADAL CITY- Nabatyagan na suno pa sang mga komunista kag rebelde nga New People’s Army ang paghuyang sang ila nga pwersa kadungan sang asod-asod nga pagsungka sang ila mga myembro labi na nag mga matag-as nga opisyal sang mga ini sa probinsya sang South Cotabato kag Sultan Kudarat.
Suno kay South Cotabato Governor Daisy Avance-Fuentes, dako ang epekto sang asod-asod nga pagsungka sang mga rebelde samtang posible nga mangin target nila sa subong ang pagdis-arma sa mga otoridad labi na sa mga rural areas bangud sa panginahanglanon nila.
Bangud sini, gin-atake sang ginabulubanta 50 ka mga rebelde nga NPA ang puluy-an sang isa ka CAFGU nga si Edwin Agnes sang Brgy. Klubi sa banwa sang Lake Sebu South Cotabato agud nga kuhaon ang kwarta sini nga nagakantidad sang P400,000 kag mga armas.
Ginapatihan naman nga mga myembro sa NPA Guerilla Front 73 ang yara sa likod sang nasambit nga krimen.
Samtang, padayon naman ang panawagan sang gobyerno sa mga rebelde nga indi pa ulihi ang tanan agud nga magsungka.
