KORONADAL CITY– Buligan sang Provincial Government sang North Cotabato ang mga miyembro sang Moro Islamic Liberation Front okun MILF kag Baranggay Peacekeeping Action Team okun BPAT nga napilasan sa nagluntad nga engkwentro sa Probinsya sang Maguindanao.
Ini matapos nga naaprubahan na sang Sangguniang Panlalawigan sang Probinsya ang ginduso nga resolusyon.
Sa nasambit nga bulig, magahatag ang Probisnya sang medical assistance sa mga miyembro sang MILF kag BPATs nga nagapakig-away sa mga Bangsamoro Islamic Freedom Fighters okun BIFF.
Sa impormasyon, madamo na suno pa sang nagkalamatay sa halos duha ka semana nga bakbakan sang MILF kag BIFF sa Sitio Digadeng, Barangay Tee sa banwa sang Datu Salibo kag naglapta pa sa iban nga banwa sa Maguindanao.
Suno kay MILF Peace Panel Chairman Mohagher Iqbal, 15 na ang napatay sa ila grupo humalin pa sang ginalagas nila ang mga miyembro sang BIFF.
Kaangot sini, nagpromisar ang MILF nga ila himuon ang tanan agud nga mapunggan ang BIFF nga makasulod sa Lanao del Sur agud nga mag upod sa Maute-ISIS.
Ini agud nga mabalabagan ang pagdako sang puwersa sang Islamic State sa Pilipinas ilabi na nga kalakip ang BIFF sa mga grupo nga nagasuporta sa ISIS sa Mindanao.
