KORONADAL CITY – Nagsaka na sa duha ang ginbawian sang kabuhi sa malapnagon nga baha sa Maguindanao kag North Cotabato matapos nga malumos ang isa ka tuig nga bata nga lalaki kag isa pa ka 12 anyos nga bata nga babaye.
Ginkilala ni MDRRMO Benjamin Alip sang Pagalungan, Maguindanao, ang gin-anod sang tubig baha nga napatay nga si Rohana Tumbaga, Grade 5 pupil kag residente sang Sitio Agakan, Barangay Inug-ug sa nasambit nga banwa.
Suno kay Alip, nakita ni Rohana nga nalumos ang utod sini nga 9-anyos nga si Raihana rason nga naluwas niya ini apang siya naman ang nalumos matapos gin-anod sang tubig-baha.
Una diri, isa ka tuig man nga bata nga lalaki ang napatay sa Barangay Talitay, Pikit, North Cotabato matapos nga mahulog sa atop sang ila nga puluy-an kag nalumos sa tubig-baha bangud sa pag-awas sang tubig sa Pulangi River.
Sa subong ginatos nga mga pamilya sa nasambit nga mga banwa ang apektado sa gihapon sang baha kun diin yara sa masobra 220 mil ka ektarya na sang mga pananom ang apektado.
Una na nga nahatagan sang bulig ang masobra 200 ka pamilya sa duha ka barangay sa banwa sang Pikit apang nagapabilin sa gihapon nga lumos sa baha ang mga ini.
