Ang mga abo sang Taiwanese actress nga si Barbie Hsu yara na subong sa Taiwan matapos siya gin-cremate sa pungsod Japan.
Ginkumpirmar sang pamilya ni Barbie sa isa ka pahayag nga ang iya mga labi nakaabot na sa iya pungsod kahapon.
Gin kumpirmar man ini sang Taiwan media nga nagreport nga ang mga abo ni Barbie gindala pabalik gamit ang isa ka private jet nga nag-abot sa Taipei Songshan Airport mga alas 3 sang hapon kahapon.
Ang balita sang kamatayon ni Barbie naggwa sang Martes, nga naghatag sang dako nga pagpangasubo sa iya mga fans sa bilog nga kalibutan, lakip na ang madamo nga mga Filipino.
Si Barbie nagsikat sa internasyonal nga entablado bilang star sa 2001 Taiwanese drama nga “Meteor Garden,” ka-upod sina Jerry Yan, Vic Chou, Ken Zhou, kag Vaness Wu.
