Ginpaidalom na sa post mortem examination ang isa ka patay nga lawas sang isa ka babaye nga nasapwan sa bahin sang kalasangan nga sakop sang Sitio El Kuda, Brgy. Puti, Norala, South Cotabato.
Ginkilala ang biktima kay si alyas Del-del, yara sa husto nga pang-edaron nga kasamtangan nga nagabusong.
Ini ang ginpahayag ni PMaj Joseph Paulo Villanueva, Chief of Police, Norala MPS sa ekslusibo nga interview sang Bombo Radyo Koronadal.
Suno sa hepe, pinaagi sa post mortem examination, mahibaluan kun anu ang kabangdanan sang kamatayon sang nasambit nga babayi.
Suno sa inisyal nga imbestigasyon sang kapulisan, naglisinsiya ang biktima nga maglakat sang hapon sang adlaw sang Biyernes agud nga mangahoy apang naabtan ini sang serom nga wala nakapuli sa ila nga puluy-an.
Nasapwan naman ini sang adlaw sang Sabado sa ginapangahuyan ini nga wala na sang kabuhi.
suno naman sa mga residente sa lugar ginlabo ang biktima tubtob siya napatay.
Dugang pa sa datos, may yara pa sang tatlo ka kabataan si alays Del-del kag nakatalana nga magabata pila ka bulan tubtob subong.
Ginpahayag man sa imbestigasyon nga apa ukon indi kahambal si alyas Del-del samtang, nauna na ini nga ginreport nga ginpangita pila la adlaw antes nasapawan nga wala na sang kabuhi sa kalasangan.
Sa karon, padayon ang maid-id nga imbestigasyon sang mga otoridad may kaangtanan sa suspek ukon mga suspek nga responsable sa insidente kag ang motibo sang krimen
