Nagapadayon sa karon ang imbestigasyon sang Tulunan MPS kaupod ang LGU kag Barangay sa banwa sang Tulunan, Cotabato matapos nga masapwan ang wala na sang kabuhi nga lapsag sa tunga sang talamnan sa bahin sang Purok 1, Barangay Bagumbayan, Tulunan, Cotabato.
Sandig sa ginpaguwa nga report sang Tulunan MPS, isa ka babaye ang lapsag nga nasapwan.
Nadiskubrihan ang bangkay sang lapsag sang mga nagaharvest sang palay sa lugar.
Gilayon nila ini nga ginreport sa Barangay kag sa pagsekyar sang mga opisyal sa bangkay, wala na sang palatandaan nga buhi ini rason nga sila ang nagtawag sa kapulisan.
Gilayon nga ginsulod sa isa ka karton ang lapsag kag gindala sa isa ka punerarya.
Sa karon, padayon nga ginausisa sang Barangay opisyal sang Bagumbayan kun may mga nagabusong bala sa ila lugar agud mahibaluan kun sin-o ang naghaboy sang lapsag.
Hugot naman nga ginakundenar sang kapulisan ang wala batasan nga ginikanan nga naghaboy sang ila kaugalingon nga bata.
