Gin ambush ang ginasakyan nga SUV sang Election Officer sa bahin sang Datu Odin Sinsuat, Maguindanao Del Norte subong nga aga, Marso 26, 2025.
Ginkilala na ang mga biktima sang pagpang-ambush nga natabo subong aga sa Barangay Makir, Datu Odin Sinsuat.
Suno sa imbestigasyon, sakay sang isa ka kulay gray nga Toyota Fortuner si Bai Maceda Lidasan Abo, opisyal sang Commission on Elections (Comelec) sa nasambit nga banwa, upod ang iya bana nga si Jojo Abo, sang ginpangluthang sila sang wala pa nakilal-an nga suspek.
Dead on the spot si Jojo Abo bangod sang iya nga mga pilas, samtang gindala naman sa balay bululngnan ang comelec officer apang ginbawian man ini sang kabuhi bangud sa pilas sa lawas.
Nagapadayon ang imbestigasyon sang kapulisan agud matumbok ang mga responsable sa krimen kag ang motibo sa pagpangluthang.
Suno sa mga otoridad, ini isa lamang sa serye sang mga ambush nga nagluntad sa lugar halin pa kahapon.
Bangud sini, ginpahugtan na ang seguridad sa banwa agud malikawan ang dugang nga kaso sang pagpangluthang.
Nagapanawagan ang lokal nga panguluhan kag mga pumuluyo sang hustisya kag gilayon nga aksyon agud matapna na ang nagasunod-sunod nga kaso sang pagpatay sa ila lugar.
