KORONADAL CITY – Preparado na sa subong ang syudad sang Koronadal sa palaabuton nga paskoronadal 2024 sa diin mangin sentro sang kasadyahan sa tion sang kapaskuwahan sa syudad.
Ini ang nangin pahayag ni Koronadal City Mayor Atty. Eliordo Ogena sa interview sang Bombo Radyo Koronadal.
Suno sa alkalde naka pulong na ini sa mga departamento sa City Hall angot sa mangin dekorasyon sa syudad sa tion sang pagselebrar sang paskwa kag bag-ong tuig.
Ginpahayag man sang alkalde nga naglab-ot man sa million ang gingahin sang syudad agud nga pondohan ang mga aktibidad kag dekorasyon sang syudad subong nga tuig.
Dugang pa sini, indi lang sa Koronadal city Hall Grounds ang mangin sentro sang atraksyon bangud maga tigana man ang iya nga pamunuan sang budget sa pagpanami sang Rizal Park kag iban pa nga mga pampubliko nga lugar sa syudad.
Wala naman ginpahayag sang alkalde ang mangin sahi sang dekorasyon sa City Hall sang syudad kag maga pabilin suno pa ini nga isa ka surpresa sa bug-os nga Koronadaleños.
Nagalaum naman ini nga mangin malinong kapaskuwahan sa syudad nga iya ginapangalagaran.
