Magapabilin sa kustodiya sang Senado si Pacifico “Curlee” Discaya II matapos nga ginbasura sang Pasay City Regional Trial Court Branch 498 ang gin-file nga habeas corpus petition sang iya kampo.
Suno sa korte, wala sang bastante nga ebidensya nga nagapakita nga nagkaroon sang grave abuse of discretion ang Senado sa pag-detine kay Discaya. Ginkumpirma ini sang iya abogado nga si Atty. Cornelio Samaniego III, nga nagsiling nga ginatinguhaan pa nila nga makuha ang opisyal nga kopya sang desisyon.
Madumduman nga ginpahamtangan sang Senado si Discaya nga in-contempt sang Setyembre 18 matapos nga ginpahayag nga nagbinutig sa pagdinig sang Blue Ribbon Committee may kaangtanan sa iregularidad sa mga flood control projects. Nagpanindugan ang Senado nga lehitimo kag suno sa Konstitusyon ang ila aksyon.
