Ginpahayag ni Senate President Pro Tempore Panfilo “Ping” Lacson nga mahimo mabutang sa archives ang partial report sang Blue Ribbon Committee sa flood control controversy kun indi makakuha sang bastante nga pirma sa tion nga mag-adjourn ang Congress sa Hunyo.
Suno sa chairman sang committee, apat pa lang sa siyam ka mga senador ang nagpirma sang partial report.
Ini ginalakipan niya kag sanday Senators Bam Aquino, Risa Hontiveros, kag Kiko Pangilinan.
Natalana nga mag-adjourn ang first regular session sang 20th Congress sa Hunyo 5, 2026, kag mag-umpisa ang second regular session sa Hulyo.
Apisar sini, nagapabilin nga positibo si Lacson nga makakuha sang bastante nga pirma ang partial blue ribbon committee report humalin sa mga myembro sini agud nga ma-tackle kag possible nga ma-adoptar sa plenaryo.
Pahayag pa niya, nagaplano siya nga personal nga ma-istorya si Senate Majority Leader Juan Miguel “Migz” Zubiri may kaangtan sa amo nga butang sa Lunes sa masunod nga semana.
Lakip si Zubiri sa mga senador nga nag-withdraw sa ila mga pirma sa draft report sang committee bangud sa pila ka problema sa gina-usar nga lenggwahe.
Matapos na-revise, ginpasalig ni Lacson nga indi magpluya sa rekomendasyon ang adjustment sa lenggwahe sa idalom sang partial report.
