KORONADAL CITY – Nagserbe nga guest speaker sang masobra isa ka libo nga mga graduating students sang Notre Dame of Marbel University sa siyudad sang Koronadal ang isa sa mga survivor sang Marawi crisis nga si Father Teresito “Tisoy” Suganob .
Sa nangin panaysayon ni Father Suganob, ang padayon nga pagpakigbahin sini sang masakit kag makahaladlok nga eksperiensiya sa kamot sang Maute-ISIS terror group ang nakabulig sa iya nga magpangabuhi sang normal sa subong.
Suno kay Father Suganob, indi niya malipatan ang nangin eksperiensiya bangud nagapadumdom ini kun sa ano siya ka palangga sang Diyos bangud ginhatagan siya sang ikaduha nga kabuhi.
Sa baylo nga mangin emosyunal, nag angkon sang pagdayaw si Father Suganob gikan sa mga estudyante bangud gin-agi niya sa lahog kag pagpakadlaw ang iya nangin eksperiensiya sa Marawi sa sulod sang 116 diyas.
Sa subong balik na sa normal ang kabuhi ni Father Tisoy kag nagalaum siya nga amo man ang iban nga mga survivors sang Marawi crisis.
Kadungan sini, ginapangamuyo sang pari nga mapadasig ang rehabilitation program sa Marawi agud nga makabalik naman sa normal nga kabuhi ang mga pumuluyo didto.
