Ginpasa ni Senador Ping Lacson ang panukala nga “Parents Welfare Act of 2025” nga nagatuyo nga masiguro nga indi pagpabay-an sang mga kabataan ang ila tigulang nga ginikanan sa tion sang kinahanglanon.
Tuyo sang panukala nga silutan ang mga indi maghatag sang suporta nga kinahanglan sang ila ginikanan.
Punto sang senador, bisan klaro sa Family Code nga obligasyon sang kabataan ang pagsuporta sa ila ginikanan, madamo nga mga tigulang nga ginikanan ang ginapabayaan na lang sang ila mga bata bangud indi na nila masarangan suportahan ang ila kaugalingon.
Dugang pa diri, ang ginikanan nga nagakinahanglan sang suporta pwede makapasa sang petition for support sa korte agud magpagwa sang support order para sa mga bata nga wala nagahatag sang suporta.
Sa sini nga proseso, pwede magbulig ang Public Attorney’s Office, kag indi na kinahanglan magbayad sang court fee.
Apang, ang mga kabataan nga indi makasunod sa support order pwede kasuhan sang levy.
Kon indi sila magsunod sa sulod sang tatlo ka sunod-sunod nga bulan nga wala sang insakto nga rason, pwede sila prisohon sang isa tubtob anum ka bulan kag multahan sang P100,000.
Ang kabataan nga ginasugo nga mag-alaga sa ila ginikanan apang ginpabay-an sila, pwede makulong sang anum tubtob napulo ka tuig kag multahan sang P300,000.
