KORONADAL CITY- Nagapadayon sa karon ang imbestigasyon sang mga otoridad sa nagluntad nga pagkarekober sang bangkay sang lalaki sa isa ka manukan sa banwa sang Banga, South Cotabato.
Sa esklusibo nga interbyu sang Bombo Radyo Koronadal kay Pol Maj. Joseph Forro, hepe sang Banga PNP, ginkilala ang biktima nga si Charles Airwin Abadiano, 28-anyos, residente sang Prk Ilang-Ilang, Brgy Malaya sang nasambit nga banwa kag estudyante sang Regency Polythecnic College.
Suno kay Forro, mismo ang amay sang biktima ang nagkumpirmar sa identity sang anak sini makaligad nga makit-an nga wala na sang kabuhi sa isa ka farm sa Sitio El Negros, Brgy San Vicente.
Nagagwa sa imbestigasyon sang PNP nga naka-angkon sang paso sa iya nga kamot ang biktima, may pilas man suno pa ini sa iya nga paa kag may agi man suno pa sang bulbwire ang ulo sini.
Nakabutang man suno pa sa siko sang biktima ang mga tsinelas sini kag nagahapa sang maabtan sang SOCO.
Nagapakig-angot naman ang PNP sa caretaker sang nasambit nga farm nga si Romulo Sikatulo.
Suno kay Sikatulo, alas 8 suno pa sang gabi sang ini ang naghalin sa bunkhouse sa nasambit nga farm kag wala man suno pa ini sang nadiskubrihan nga tawo apang sang nakabalik na suno pa ini sang alas 8 sang aga kahapon agud kuntani magpamubod sang mga manok, nasapwan na lamang sini ang biktima nga wala na sang kabuhi.
Sa karon, ginpaidalom na sa autopsy ang bangkay sang biktima agud nga mahibaluan ang matuod nga ginkamatay sini.
