KORONADAL CITY – Nakaalerto sa subong ang militar sa posible nga pag-atake sang panibag-o nga mga armado nga grupo nga ginamonitor sa boundary sang probinsiya sang South Cotabato kag Sultan Kudarat.
Ini ang ginpahayag ni Lt. Col. Harold Cabunoc, ang commanding officer sang 33rd IB Philippine Army.
Suno kay Cabunoc, ang nasambit nga grupo ang kilala nga Platoon Arabo nga ginpamunuan ni Ka Yoyo Braganza sang NPA nga suno pa nagpang-into sang mga residente kag involbado sa nagkalain-lain nga krimen.
May kuta suno pa ang mga ini sa boundary sang Bagumbayan, Sultan Kudarat kag Brgy Ned , Lake Sebu, South Cotabato.
Sa subong, padayon ang ila nga monitoring bangud sa pamahog nga pag-atake sang mga ini matapos nga kanselaron ni Pangulong Rodrigo Duterte ang peace talks sa leftist kag ginkabig nga terorista ang mga ini.
Nahibaluan nga ginkumpirmar mismo ni PSSUPT Franklin Alvero, provincial director sang South Cotabato nga may nabaton sila nga report angot sa presensiya sang mga armado sa nasambit nga lugar nga handa nga maglunsar sang pag-atake sa mga government installations kag mga detachment.
Kaangot sini, preparado man ang militar kag kapulisan sa posible nga pag-atake sang mga rebelde.
