KORONADAL CITY – Nagpadulong sa waragwagan sang Bombo Radyo Koronadal ang grupo sang mga investors agud nga ireklamo ang isa suno pa ka coordinator nga nagapangolekta sang kwarta katal-os sang promisa nga 100% money back gurantee.
Sa esklusibo nga interbyu sang Bombo Radyo Koronadal kay Alyas Inday, isa sa mga investors sa South Cotabato, gina-awhag suno pa ini ni Jenny Baylosis Billanes nga mag-invest sang kwarta katal-os sang promisa nga magadoble ukon magadako ang iya nga interes pagkaligad lang sang pila adlaw.
Gin-usar man suno pa ni Billanes ang pangalan nanday Senator Manny Pacquaio kag asawa nga si Jinkee Pacquiao agud makapang-awhag sang mas madamo nga investors.
Nag-umpisa suno pa ang pagpang-awhag kag pagpangolekta sang kwarta ni Billanes sang bulan sang Mayo kag tubtub karon wala pa nakapay-out ang mga ini.
Suno naman sa isa pa ka investor nga si Alyas Linda, indi ma-athag sa ila kun sa diin nga investment company ginbutang ni Billanes ang ila nga kwarta bangud may ginahambal suno pa ini nga forex, ever arm, shantal kag munifecence.
Nagpamalibad naman nga magpa-athag si Billanes sa baylo ginpanginwala sini ang tanan nga mga akusasyon sang mga investors.
Nagdangop naman sa NBI ang mga biktima agud nga magsang-at sang kaso sa suspek.
